حوار مع ادهم صبرى رجل المستحيل

طبعا كلنا عارفين أدهم صبري بطل سلسلة روايات (رجل المستحيل ) أكثر الكتب مبيعا بين الشباب..

رجل المستحيل , ضابط المخابرات المصري إللي عمل ما يزيد عن 150 مغامرة دوّخ فيها اجهزة مخابرات العالم و يطلع كل مرة زي الشعرة من العجين.. ضابط المخابرات المصري إللي خلى جيمس بوند راحت عليه خلاص .. رجل المستحيل إللي بيجيد جميع اللغات الحية و الميتة و يجيد جميع رياضات الدفاع عن النفس و استخدام جميع أنواع الأسلحة و يجيد قيادة جميع أنواع المركبات.. كلناعارفينه طبعا...و بنتابع رواياته بكل فخر و انتماء..

و عشان قراءنا الأعزاء قوي قررنا نعمل معاه حوار , من موقع الحدث أثناء أحد مغامراته...أي خدمة يا شباب !

المكان : أحد ابقاع النائية في العالم..

الموقف : سبعة جيوش من دول مختلفة تطارد أدهم صبري.. النيران و القذائف تحيطه من كل جانب , و القناصة و المدرعات و الطائرات تطارده و مهمتهم الوحيدة هي القضاء عليه لأنه عامل لهم وجع دماغ زيادة عن اللزوم !!

أدهم صبري يحتمي بجدار شبه متهدم و يعيد حشو ( الآر بي جي ) الخاص به .. في هذه اللحظه جاءت فرصتي لإجراء حوار انفرادي معه...

- بنرحب بيك في ( منتدى صحبه نت ) يا أستاذ أدهم ..

- أهلا بيك !

- قصصك في معرض الكتاب بتحقق مبيعات هايله بين الشباب.. تفتكر ليه ؟

- يمكن عشان بيحبوا يعيشوا العالم ده .. لكن أنا نفسي مش عارف ليه بصراحة !

- لما بتروح معرض الكتاب بتشتري ايه ؟

- اي حاجه غير القصص بتاعتي !

- إنت مصري صميم و بتكلمني دلوقتي بالعامية.. أمال ليه بتتكلم باللغة العربية الفصحي في قصصك ؟

- أنا باتكلم بالعامية طبعا لكن باتكلم بالفصحى عشان شغل قصص بقى .. مانت فاهم !

- ما هي هواياتك ؟

- إني اطارد عملاء الموساد و أبوظ عملياتهم... و اعكنن على أجهزة المخابرات المعادية.. و المهم طبعا إني أبسط القراء..عن إذنك !

و انحنى ليتفادى طلقة مدفع و انهال بوابل من الرصاص لينسف دبابة و يعود لحشو الكلاشينكوف الخاص به..

- ماذا تفعل في وقت فراغك؟

- ماظنش إن كان عندي وقت فراغ أساسا.. إنت مش شايف ؟؟

- ماهي أكلتك المفضلة ؟ المنسف ؟

- اى حاجه خلقها ربى لأ.. باحب !

-طيب..من هو مطربك المفضل ؟

- عاجباني جدا أغنية ( ماتفولش إيه و ازاي و ليه؟) بتاعة فيلم مافيا, إللي غناها مدحت صالح .. لأنها بنتطبق على كل حاجه بتحصل عندنا.. مش هاتفهم حاجة !

- بيجيلك ايميلات من المعجبات ؟ و بترد عليها ازاي ؟

- عندي ايميل فعلا.. و بيجيلي ايميلات كتير من المعجبات ..لكن باحاول أفوقهم و اقول لهم إني مش شخصية حقيقية و إني شخصية روائية و أقنعهم نهم صعب يلاقوا حد بالشكل ده..كانت (مني) أشطر

- بتروح فين في الاجازة ؟

- أنهي أجازة ؟!!

من الملاحظ إن إنت دايما لابس بدلة زرقاء مع كرافته حمراء.. ليه ؟

- بالبس كده طبعا.. لكن الرسام مش بيرسمني غير كده!

- بتخرج فين مع شلتك ؟؟

- ماليش شلة.. هم منى و قدري ماليش صحاب غيرهم .. باروح معاهم مغامرة مثلا.. نطارد حد.. نهرب من مطاردة حد.. هي دي التسلية بتاعتنا !

- إيه علاقتك بمؤلفك د. نبيل فاروق ؟

- أعرفه من بعيد , لكن باقرا إسمه على القصص بتاعتي.. بيحصل بيننا مشاكل كتير طبعا لأنه كل شوية يموّتني و يدوخني .. ممرمطني معاه و الله الراجل ده !

- فيه واد صاحبي مضايقني عايزك تروقهولي (عارف نفسك ولا لا ).. ايه نظامك في العملية دي ؟

-لا روح لسونيا هي بتاعة الكلام ده .. أنا راجل محترم ماليش في الحاجات دي !

- بتقرا مواضيعى في منتدى صحبه نت ؟؟

- طبعا باقراها .. أمال باعمل إيه بين كل مغامرة و التانية ؟!!

- نصيحتك إيه للشباب اللي عايز يبقى ضابط مخابرات جامد زيك ؟

- أكتر حاجه بتضحكني لما بيجيلي شاب صغير يقوللي : عايز أكون ضابط مخابرات ! دي عملية صعبه جد أهم حاجه انك تركز تكون انسان ناجح !

- تعرف رأفت الهجان و جمعة الشوان ( كزملاء مهنة ) و بتقعدوا عالقهوة مع بعض و كده ؟

- دول مش زملاء مهنة .. لأنهم عملاء بس مش ضباط مخابرات .. عملوا خدمات جليلة للوطن طبعا لكن مش زملاء مهنة..مش ضباط مخابرات !

- هل هاتستمر و لا لأ ؟

- فيه عقبات بتواجهني حاليا لكن مش عارف هاستمر و لا لأ.. أنا ناوي لكن مش عارف الحياة ناوية و لا لأ !

- هل لديك أقوال أخرى ؟

- أقر بكل ما جاء في هذا التحقيق !

- شكرا يا أستاذ أدهم..

ابتسم ابتسامة واثقة و أجاب :

- العفو..

و استدار على عقبيه في مرونة فائقة ليلكم أحد المقاتلين في وجهه.. و اعتدل ليواجه الجيوش وحده في بسالة , لأنه الرجل..

رجل المستحيل !!

كان معكم من قلب الاحداث

مراسل الصحبه

&& kaboooo&&

انتة رائع يا كابو